Mu Karere ka Ngororero ibikorwa byo kwibuka Jenoside yakorewe Abatutsi mu 1994 birakomeje. 
Uyu munsi habaye ibikorwa byo kwibuka ku nshuro ya 32 abarimu n'abanyeshuri bazize Jenoside yakorewe Abatutsi muri Mata 1994
Ku rwego rwAkarere iki gikorwa cyabereye mu Murenge wa Matyazo mu Kigo cy'Ishuri cya TTC Muramba; cyitabiriwe n'Umuyobozi w'Akarere ka Ngororero Bwana NKUSI Christophe, ari kumwe n' Inzego z'Umutekano, Perezida wa IBUKA n'uwa AVEGA mu Karere, bamwe mu bajyanama mu nama Njyanama y'Akarere, Abayobozi n'abaturage b'umurenge wa Matyazo. 
Igikorwa cyatangijwe n'umunota wo kwibuka, hakurikiraho  isengesho no gucana Urumuri rw'icyizere.
Hatanzwe ikiganiro gisobanura amateka ya Jenoside yakorewe Abatutsi muri Mata 1994 harimo uko jenoside yateguwe nuko yashyizwe mu bikorwa. Abanyeshuri basabwe kwirinda amacakubiri no  kwirinda ibikorwa byose bihembera urwango n’ingengabitekerezo ya Jenoside basabwa kwimakaza gahunda ya  Ndumunyarwanda. Hanatambutse ubutumwa bw'ihumure binyuze mu ndirimbo y'abanyeshuri bari muri club y'ubumwe n'ubudaheranwa muri  TTC Muramba.
Umuyobozi w'Akarere akaba   n'umushyitsi mukuru yatanze ubutumwa asaba urubyiruko rw'abanyeshuri gukomeza kugira ubumwe no kurwanya ingengabitekerezo ya Jenoside aho yaturuka hose anababwira ko jenoside itazongera kubaho ukundi.
Igikorwa cyaranzwe kandi no kuremera uwarokotse Jenoside yakorewe Abatutsi mu 1994 mu rwego rwo kumwunganira mu mibereho myiza. 
#Twibuketwiyubaka.