Mu Karere ka Ngororero hizihijwe umunsi wahariwe ingo mbonezamikurire (ECD DAY) no kurwanya igwingira. Igikorwa cyabereye mu murenge wa Kabaya. Insangayamatsiko iragira iti: "Mubyeyi jyana umwana wawe mu rugo mbonezamikurire rukwegereye, umugaburire indyo yuzuye hatabuzemo ibikomoka  ku matungo. UMWANA UTAGWINGIYE, ISHEMA RYANJYE."
Ibirori byabanjirijwe no gusura urugo mbonezamikurire rwa Rich Kabaya mu mudugudu wa Nyanza aho abana bagaburiwe indyo yuzuye. 
Mu Karere ka Ngororero harabarurwa  ingo mbonezamikurire 1,165 zakira abana bagera ku 32,399, muri bo abakobwa ni 16,539, abahungu 16,760.
Avuga ku kamaro k'ingo mbonezamikurire intumwa y'Ikigo cy'Igihugu Gishinzwe Imikurire no Kurengera Umwana (NCDA) yibukije ko zitanga serivisi ziri mu nkingi 6: imirire,  ubuzima, amazi isuku n'isukura (WASH), uburyo bwiza bwo kurera umwana, gufasha abana mu myigire no kwita ku burenganzira bw'umwana.
Akarere ka Ngororero kageze ku kigero cya 35,8% cy'abana bafite igwingira (Demographic and Health Survey 2025) kavuye kuri 50,5%. (DHS 2019-2020). Habayeho igabanuka rya 14,7% mu myaka 5 ishize.
Intumwa ya NCDA  yasabye ko ingo mbonezamikurire z'abana bato zikomeza gushyirwamo imbaraga kuko abana bakomeze kuziboneramo iby'ibanze by'ingenzi bibafasha gukura neza haba mu bwenge ndetse no mu gihagararo. 
Umuyobozi w'Akarere wungirije ushinzwe imibereho myiza y'abaturage Madamu Mukunduhirwe Benjamine wari umushyitsi mukuru yashimiye ubuyobozi bwiza bw'Igihugu cyacu burangajwe imbere na Nyakubahwa Perezida wa Repubulika Paul Kagame buhora buzirikana iterambere ry'imibereho myiza y'abaturage kuva ku bana bato kugeza ku bantu bakuru. Yasabye ababyeyi kuba ba  muudatenguha bakikiriza intero iturutse ku buyobozi bukuru bw'Igihugu cyacu. 
Ibirori byaranzwe no gushyikiriza seritifika z'ishimwe abakora mu ngo mbonezamikurire no kuremera bamwe mu baturage mu buryo bwi kubafasha kwigobotora ubukene.
Ibirori byitabiriwe kandi n'intumwa z'abafatanyabikorwa nka World Vision  Rwanda,  AEE, CARITAS NYUNDO,  abahagarariye inzego z'umutekano, Amadini n'amatorero, intumwa za PSF, CNF na CNJ.