Uyu munsi mu murenge wa Kavumu habaye igikorwa cyo gutangiza ku mugaragaro umushinga wa CACCE ugamije gufasha abaturage guhangana n’imihindagurikire y’ikirere. Iki gikorwa cyayobowe n’Umuyobozi w’Akarere Wungirije ushinzwe Iterambere ry’Ubukungu, ari kumwe n'abayobozi b'inzego z'umutekano,  intumwa za World Vision Rwanda n’abayobozi batandukanye bo mu nzego z’ibanze.
Uyu mushinga uri gushyirwa mu bikorwa n’Akarere ka Ngororero ku bufatanye na World Vision Rwanda, ukaba uterwa inkunga na FONERWA. Umushinga uzamara imyaka ibiri.
Mu bikorwa byaranze itangizwa ry’uyu mushinga, hatewe urubingo ku buso bungana na hegitari 1.5, hanakorwa urugendo rugamije gusura  umurima wa hegitari 3.5 zatewemo ingano.
Mu ijambo rye, Innocent Mutabazi yashimye ubufatanye bwiza buri hagati ya World Vision n’Akarere ka Ngororero, anashimangira ubushake bwo gukomeza ubwo bufatanye hagamijwe guteza imbere imibereho myiza y’abaturage.
Mu ijambo rye, Umuyobozi w’Akarere Wungirije ushinzwe Iterambere ry’Ubukungu yashimiye Perezida wa Repubulika ku nkunga n’imishinga y’iterambere akomeje kugeza ku baturage b’Akarere ka Ngororero. Yongeyeho ko ubufatanye hagati ya World Vision Rwanda n’Akarere ka Ngororero bumaze kugera ku rwego rushimishije rw’iterambere. Yanashishikarije abaturage kurinda ibikorwa by’umushinga no gukomeza kubungabunga ibyagezweho kugeza ubu.