Kuri uyu wa gatandatu tariki ya 20 Kamena Minisitiri wa Minisiteri ishinzwe ibikorwa by'ubutabazi akaba n'imboni y'Akarere ka Ngororero muri  Guverinoma  Kayisire Marie Solange yifatanije n'abaturage  b'aka Karere mu muganda wo gutangiza iyubakwa ry'amashuli 566 n'ubwiherero 748.

Igikorwa cyabereye mu murenge wa Muhororo mu rwunge rw'amashuli rwa Kanogo.
Yakiriwe n'umuyobozi w'Akarere Bwana NDAYAMBAJE Godefroid,  VmASOC Madame Mukunduhirwe Benjamine n'abayobozi b'inzego z'umutekano.
Abaturage bishimiye aya mashuli aje ari igisubizo mu  kugabanya ubucucike mu mashuli  n'ingendo abana bakora bajya ku mashuli amwe namwe.

Umuyobozi w'Akarere Bwana NDAYAMBAJE Godefroid yavuze ko yizeye imbaraga z'abaturage ku buryo aya mashuli azigirwamo mu kwezi kwa cyenda.
Mayor yanavuze ko nubwo izi nyubako z'amashuli zibangikanye  no kubaka amazu y'abaturage basenyewe n'ibiza umuhigo uzeswa neza  kandi ku gihe.

Minisitiri Kayisire  yasabye imbaraga za buri wese by'umwihariko ababyeyi kugirango inyubako zizarangire  ku gihe. Aya mashuli niyuzura hari icyizere ko ubucucike buzagabanuka ku buryo icyumba kimwe kuzajya cyakira abanyeshuli 45 gusa.

Minisitiri Kayisire yagarutse ku biza bikunze kwibasira Akarere ka Ngororero yibutsa abaturage kwitwararika ku bidukikije babungabunga ubutaka bwabo kimwe n' ubwubatseho aya mashuli.
Yanavuze ku cyorezo cya Coronavirus akangurira abaturage gukomeza kubahiriza amabwiriza yo kugikumira no kucyirinda.
Yasabye ababyeyi kwita ku burere bw'abana banabarinda igwingira n'imirire mibi.