Kuri uyu wa mbere tariki ya 6/07/2023 abaturage b'Akarere la NGORORERO bazindukiye mu gikorwa cyo  gutera ifumbire ya DAP yifashishwa mu kubagara ibigori. Ni ifumbire bakesha Ubuyobozi bwiza bw'Igihugu cyacu bwayibagejejeho kuri nkunganire y'ijana ku ijana bivuga ko bayiherewe ubuntu.
Ku rwego rw'Akarere igikorwa cyabereye mu murenge wa Muhororo mu Kagari ka Myiha mu kibaya gihujeho ubuhinzi bw'ibigori kuri hegitari 13.

Umuyobozi w'Akarere Bwana NKUSI Christophe ari kumwe n"umuyobozi w'Akarere wungirije ushinzwe iterambere ry'ubukungu Uwihoreye Patrick, bamwe mu bayobozi b'inzego z'umutekano zikorera Karere, abakozi bo mw'ishami ry'ubuhinzi bari kumwe n'abaturage bo mu murenge wa Muhororo.
Abahinzi bishimiye uburyo Leta ibagezaho ifumbire ituma babona umusaruro uhagije. Bati turashimira ubuyobozi bwiza bw'Igihugu cyacu budahwema kuzirikana ku iterambere ry'imiberho myiza y'abaturage.

Akarere la NGORORERO kakiriye ifumbire yo kubagaza ibigori ingana na toni 21,100. Ubuso buhinzeho ibigori mu Karere ka NGORORERO  bungana na hegitari 4617.

Nanone mu bikorwa by'ubuhinzi kuri uyu wa kabiri tariki ya 7/11/2023 abaturage b'Akarere ka NGORORERO bazindukiye mu gikorwa cyo kuvugurura urutoki. Ni Igikorwa kiri kubera mu mirenge 8 ihinga urutoki.
Ku rwego rw'Akarere igikorwa cyabereye mu murenge wa Hindiro mu Kagari ka Gatare. Umuyobozi w'Akarere Bwana NKUSI Christophe ari kumwe na bamwe mu bayobozi b'inzego z'umutekano zikorera mu Karere, abakozi b'umurenge n'utugari bifatanije n'abaturage b'uyu murenge ahazaterwa imibyare y'ibitoki biribwa 6,125 ku buso bwa hegitari 6.

Biteganijwe ko muri iriya mirenge 8 hazaterwa imibyare 44,400  kuri hegitari 45.
Igikorwa cyitabiriwe na Rwiyemezamirimo (wagemuye imibyare) Bwana Rubashamuheto Daniel  waturutse mu Karere ka Muhanga werekereye abitabiriye iki gikorwa uburyo bahinga urutoki rugakiza nyirarwo. Yavuze ko yari mu kiciro cya mbere cy'ubudehe atunzwe no guca inshuro none ubu akaba abarirwa mu bakire.

Umuyobozi w'Akarere yashishikarije abaturage kuvugurura urutoki rubyara inyungu agira ati " mubikorane umwete  kuko Iyi ukora akazi kagutunze ugomba kugakora kinyamwuga."

Nsengimana Visenti ni umuhinzi wiyemeje kuvugurura urutoki:  
"Turambiwe guhinga urutoki aho umuhinzi ajya mu murima agahambira ibitoki 10 mu gitebo kimwe. Turashaka guhinga insina tuzajya disaruraho igitoki cy'ibiro 100." Igikorwa cyo kuvugurura urutoki nikigera ku ntego bizafasha kuzamura ubukungu bw'ingo no kurwanya imirire mibi.
Mu Karere ka NGORORERO abahinzi bavuga ko urutoki rwabo rwiganjemo insina bita indaya zitanga ibitoki byengwamo inzoga.