Umuyobozi w'Akarere wungirije ushinzwe iterambere ry’ubukungu Bwana UWIHOREYE Patrick, yashyikirije ku mugaragaro amamoto atanu abavuzi b’amatungo bigenga bakora nk’abashoramari b’ubuvuzi bw’amatungo mu baturage (CAVEs).
Igikorwa cyateguwe ku bufatanye na Heifer International cyashyizwe mu bikorwa binyuze mu mushinga RDDP–Heifer, kigamije gushimangira ireme n’imitangire myiza ya serivisi z’ubworozi mu Karere. Igikorwa cyo gutanga ayo mamoto cyagaragaje ubushake bw’Akarere bwo guteza imbere serivisi z’ubuvuzi bw’amatungo no gushyigikira uruhare rw’abikorera mu iterambere ry’ubworozi.
Ayo mamoto yashyikirijwe CAVEs bakorera mu mirenge ya Bwira, Gatumba, Kageyo, Kavumu na Nyange, ari na ho umushinga RDDP–Heifer watanze inka mu rwego rwa Gahunda ya Girinka Munyarwanda. 
Ubu bufasha bugamije kongerera abavuzi b’amatungo bigenga ubushobozi bwo kugera ku borozi vuba kandi neza, gutanga serivisi z’ubuvuzi ku gihe, gukurikirana no kugenzura indwara z’amatungo, ndetse no gutanga inama ku borozi zijyanye n’ubuzima bw’amatungo n’umusaruro wayo.
Mu ijambo rye, Visi Meya Uwihoreye  yagaragaje ko itangwa ry’ayo mamoto rizagira uruhare runini mu kunoza itangwa rya serivisi, kongera umusaruro w’ubworozi, no guteza imbere  Gahunda ya Girinka. 
Abahawe amamoto bashimiye Akarere n’abafatanyabikorwa, banasezeranya kuyakoresha neza mu gufasha aborozi ku buryo bunoze.