Ikibazo cy'ubutaka cyari hagati y'abaturage n'uruganda rw'icyayi rwa Rubaya cyabonewe umuti

Ni ubutaka uru ruganda rwemeza ko rwaguze n'aba baturage bahejwe inyuma n'amateka mu murenge wa Muhanda mu kagari ka Bugarura ariko bo bakabihakana. Hari mu rwego rwo kwagura ubuso icyayi gihinzweho.

Nyiri uru ruganda rwa Rubaya Mountain Tea ariwe Rwanda Mountain Tea Company yagaragaje ko babajwe n'uko itangazamakuru ryabasize icyasha rititaye gucukumbra ikibazo mu mizi; ubwo ryavugaga ko bambuye abaturage ubutaka kandi aho bakorera hose baharanira iterambere ry'abaturage babaha akazi, bubaka amashuli, batanga amafumbire, imbuto n'ibindi.
Yagaragaje ko nta mwenda bafitiye abaturage; ko baguze nabo mu buryo bwemewe n'amategeko.
Yasabye ko Akarere kabafasha kubona ihererekanya butaka (mutation), kakanabafasha kunyomoza ibihuha byahise mw'itangazamakuru, ndetse na nyir'ukubitangaza akazabinyomoza.


Uwahoze ayobora uruganda rw'icyayi rwa Rubaya  Bwana Nkulikiyinka Jean Nepomuscene yavuze ku mavu n'amavuko y'ubugure aba baturage bagiranye n'uruganda igihe yari arubereye umuyobozi, agaragaza ko byakozwe mu mucyo, ko ibyo abaturage bavuga nta shingiro bifite. Yasabye ko Rubaya Mountain Tea yarenganurwa  igasubizwa  icyubahiro yambuwe kandi abaturage bagasobanurirwa ukuri nyako kw'ibintu.


                 Impande zombi zabanje kujya impaka mbere yo kumvikana

Byaje kuba ngombwa ko buyobozi bw'Akarere  butega amatwi impande zombi: Abaturage bakomeje guhakana  ko batagurishije  ariko uwari Umuyobozi w'uruganda Bwana Nkurikiyinka J.N arabanyomoza ahamya ko baguze ku buryo bukurikije amategeko kandi amafaranga yabo agashyirwa kuri konti zabo mu murenge Sacco. Yongeyeho ko ataribo bagurishije bonyine  ko hari n'abaturanyi babo uruganda rwaguze nabo.

Bwana Nkurikiyinka yanerekanaga impapuro z'ubugure ziriho imikono y'impande zombi ndetse n'iy'abagabo bahagaze kuri ubwo bugure. Izi mpapuro abaturge bakomeza kutazemera.

Bamwe mu bagabo basinye ku masezerano y'ubugure batanze ubuhamya:
Nzeyimana Leonidas wahoze ari umuyobozi w'akagari ka Bugarura akaba mu bagabo basinye ku masezerano y'ubugure yahamije ko ubugure bwabaye kandi ku buryo bwa burundu.
Mutwarangabo Innocent wari umuyobozi w'Umurenge wa Muhanda igihe ubugure bwabagaho nawe yahamije ko habayeho kugura no kugurisha ku buryo bukurikije amategeko.
Havugimana Samuel Songa  ni umuturanyi w'aba bagurishije. Nawe yahamije ko bagurishije 100%.

Nyuma yo kwisobanura no kumvikana kw'impande zombi abaturage bemeye ko bazasinya  ihererekanya ry'ubu butaka (mutation)  kuwa mbere tariki ya 8/02/2021.

 Nyuma umuyobozi w'Akarere n'inzego bari kumwe bashisihikarije aba baturage kwitabira akazi gahoraho kabategereje mu ruganda; bakirinda gupfusha ubusa amahirwe  begerejwe.   

Nk'uko bisanzwe ngo nibagaragaza ubushake bwo gukora,  uruganda rwa Rubaya Mountain Tea rwiteguye kubaha akazi gahoraho. Inzego zibegereye zasabwe gukomeze kubigisha agaciro ko gukora bakareka ibitabafitiye umumaro nk'ubunebwe n'amatiku.

Uku gukemura impaka kwateranije Komite Nyobozi y'Akarere, General Manager  wa Rwanda Mountain Tea Company, inzego z'umutekano, uwahoze ari DG wa Rubaya Mountain Tea igihe ubugure bwabagaho,  DG uyiyoboye muri iki gihe, ubuyobozi bw'umurenge wa Muhanda n'uwahoze ari umuyobozi wawo.