Ngororero: Save the Children iraharanira kumvikanisha ijwi ry'abana bafite ubumuga

Kuzamura ijwi ry'umwana ufite ubumuga ni ingingo yibanzweho mu biganiro bitandukanye mu nama yahuje Save the Children,  HVP Gatagara,  abakozi b'Akarere bafite inshingano zifite aho zihurira n'abana by'umwihariko, abahagarariye inama y'igihugu y'abafite ubumuga ku Karere no mu mirenge, na bamwe mu babyeyi  bafite abana bafite ubumuga.  Inama yayobowe n'Umunyamabanga nshingwabikorwa w'Akarere Bwana Abiyingoma Gerard.


Umukozi wa Save the Children Mukantagwera Liliose yavuze ko bashishikajwe no kuba ijwi y'abana bafite ubumuga. Mu kwezi gushize kwa Gashyantare uyu mushinga wazanye abaganga ba HVP Gatagara gusuzuma abana bafite ubumuga mu mirenge 13 igize akarere ka Ngororero kugirango babone bazahabwe ubufasha n'ibitaro bya Gatagara. Gusa hari abana batari bake bacikanwe.
Umukozi b'ibitaro bya HVP Gatagara ishami rya Gikondo yerekanye ko mu bugenzuzi bakoze mu mirenge 13 igize Akarere basanze hari aho abana batiga neza kubera ikibazo cy'ihungabana n'imitekerereze bikomoka ku mibereho mu miryango yabo. Basanze abenshi bafite ikibazo cy'imirire mibi kuko usanga ibiro bafite bihabanye n'imyaka yabo.
Mu kungurana ibitekerezo hifujwe ko inyunganirangingo n'insimburangingo zihenze cyane zashyirwa mu bwisungane mu kwivuza. Hari abana benshi bacikanywe n'amahirwe yo gusuzumwa ubumuga bafite nabo bakaba bagerwaho.
Inyubako za kera zidafite inzira zorohereza abafite ubumuga zigomba gukosorwa.
Hanavuzwe ku nzira ndende abafite ubumuga banyura kugurango bivuze.
Izi mbogamizi Umunyamabanga nshingwabikorwa w'Akarere ka Ngororero Bwana Abiyingoma Gerard yavuze ko ku bufatanye bw'Akarere n'abafatanyabikorwa nka Save the Children, HVP Gatagara zizagenda zibonerwa ibisubizo.

Umukozi w'Akarere ufite abafite ubumuga mu nshingano  Bwana Ndayambaje Galois Vedaste yerekanye ibyavuye mw'ibarura: mu Karere ka Ngororero abana bafite ubumuga bagera kuri 1581. Muribo abahungu ni 855 abakobwa 726.
Abiga: 965,  abatiga:616. 1042 bakeneye inyunganirangingo n'insimburangingo.
Yanerekanye uburyo ibikorwa remezo hamwe na hamwe bitorohereza abafite ubumuga haba mu mashuli, kwa muganga n'ahandi hatangirwa serivisi zitandukanye.
Umukozi w'ikigo cy'igihugu cy'imikurire no kurengera umwana (NCDA) Mukashyaka Jeanne nawe yavuze ku buryo abana bafite ubumuga bakwiye kwitabwaho.  Yagarutse ku kamaro k'Inshuti z'Umuryango, abajyanama  b'ubuzima,  abayobozi b'imidugudu, ba malayika mulinzi mu kureberera bene aba bana.