AKARERE KA NGORORERO: Kanda hano ubone ikarita

Akarere ka Ngororero gafite ubuso buhwanye na Km² 679. Ngororero iherereye mu majyaruguru y'iburengerazuba bw'u Rwanda, mbese mu Ntara y'Iburengerazuba. Igizwe n'Imirenge 13, Utugari 73, Imidugudu 419. Akarere gafite abaturage 333,723; ubucucike ni abaturage 493 kuri km2 , ingo 74,613 (Ibarura rusange ry'abaturage 2012).  

Ngororero ihana imbibi n'Uturere 5:

  • Mu majyaruguru y'iburasirazuba hari Gakenke
  • Mu majyaruguru hari Nyabihu
  • Mu majyepfo hari Karongi
  • Mu burasirazuba hari Muhanga mu burengerazuba hakaba Rutsiro. 

Ikicaro cy'Akarere kiri ku muhanda Muhanga-Ngororero-Kabaya-Mukamira kuri km 46,6 uvuye Muhanga na km 60 ugana Mukamira.

Akarere kagizwe n'imisozi miremire yungikanya n'ibibaya. Ubutumburuke bw'aho ni hagati ya metero 1,460 na metero 2,883, umusozi usumba iyindi ni uwa Bweru uri mu Murenge wa Muhanda ufite ubutumburuke bwa metero 2,883.4. Impuzandego y'ubutumburuke ni metero 1,500. Impinga ndende cyane uzisanga mu ishyamba rya Gishwati nka Mugano (2,842.1 m), Butimba (2,833.5 m), n'ahandi nka Kagano (2,450 m), Nyaburama (2,427 m), Ntaganzwa (2,257 m), Rushari (2,059 m), Gatwebano (2,023 m), Mushyiga (1,930 m) na Ruhunga (1,978 m).

Ibihe by'imvura n'izuba ni bine. Impuzandengo y'ubuhehere ku mwaka ni degree 18°C, Ariko buhinduka hakurikijwe ubutumburuke bw'imisozi. Uko ibyo bihe bikurikirana: Umuhindo kuva mu Kwakira kugera m'Ukuboza. Ni igihe cy'imvura iringaniye, igihe abahinzi batera imbuto zinyuranye. Urugaryi kuva mri Mutarama kugeza Gashyantare.  Ni igihe k'izuba riringaniye. Itumba kuva muri Werurwe kugeza Kamena. Ni igihe k'imvura nyinshi, hari n'indi imyaka iterwa. Hari n'Icyi igihe cy'izuba ryinshi gitangira kuva muri Nyakanga kugeza muri Nzeri. Ni  igihe cy'isarura ry'imyaka no guhinga ibishanga.

Akarere ka Ngororero ni akarere k'amazi menshi kuko kari mu kibaya kigari cy'uruzi rwa Nili. Kubera n'imisozi miremire myishi mu bibaya byayo hari  imigezi inyuranye. Umugezi w'ingenzi ni Nyabarongo n'iyindi nka Rubagabaga, Mukungwa, Satinsyi, Muhembe, Kibirira, Rukubi, Kintiti, Nyampiri, Mugunda, Giciye, Rucanzogera,, Nyantanga na Gasumo.

Mu nyamaswa higanje cyane Inyoni n'ibisiga nka Kagoma, Ibyiyoni, n'ibihunyira n'izindi nk'inuma, inkware, intashya, ibishwi n'imisambi. Hari n'izindi nyamaswa ntoya. Nkuko byagenze henshi mu gihugu ishyamba rya kimeza ryagiye rigabunuka mu buso kubera umuvuduko w'ubwiyongere bw'abaturage. Ariko hari ahakiri ibisigara nko hejuru ku misozi. Ubu ibimera ahanini bigizwe n'inturusu n'ibindi biti by'ishyamba mu mpande z'imirima.